មេបញ្ជាការយោធាថៃ នៅថ្ងៃអង្គារនេះ
សន្យាថាខ្លួននឹងដកកងកម្លាំងប្រដាប់អាវុធចេញពីតំបន់ដីទំហំ៤.៦
គីឡូម៉ែត្រក្រឡា និងព្រមព្រៀងគ្នារក្សាសន្ដិភាព
សណ្ដាប់ធ្នាប់នៅតំបន់មួយចំនួនទៀត ក្បែរប្រាសាទព្រះវិហារ
ដោយមិនបង្កឲ្យមានការផ្ទុះសង្គ្រាមដាក់គ្នានោះឡើយ។
ក្នុងជំនួបរយៈពេលជាង១០នាទី
ដែលធ្វើឡើង
នៅខាងមុខប្រាសាទព្រះវិហារ ភាគីខាងកម្ពុជា
ដឹកនាំដោយមេបញ្ជាការកងពលអន្ដរាគមន៍លេខ៣ប្រចាំប្រាសាទព្រះវិហារ
លោក ស្រី ឌឹក។ ចំណែកភាគីថៃ ដឹកនាំដោយ មេបញ្ជាការកងពលតូចលេខ៦ លោក
ថៈរ៉ាកន ថាំម៉ាក់ វិនថូន ។
ជំនួបនេះ
ត្រូវធ្វើឡើងបន្ទាប់ពីតុលាការ បានសម្រេចថា កម្ពុជា មានអធិបតេយ្យ
ពេញលេញលើបូរណភាពទឹកដីលើតំបន់ពយភ្នំនៃប្រាសាទព្រះវិហារ
ដូចដែលមានកំណត់ ក្នុងកថាខណ្ឌ ទី៩៨ នៃសាលដីកានេះ ហើយជាបច្ច័យ
តុលាការប្រកាសថា រាជាណាចក្រថៃ មានកាតព្វកិច្ចដកចេញពីទឹកដីនេះ
នូវគ្រប់កងកម្លាំងប្រដាប់អាវុធ ឬកងនគរបាល ឬឆ្មាំយាមផ្សេងទៀត របស់ថៃ
បើបោះទីតាំងនៅក្នុងទឹកដីនោះ។
លោក ថៈរ៉ាកន ថាំម៉ាក់វិថូន
ថ្លែងតាមរយៈអ្នកបកប្រែថា ភាគីថៃ
នឹងអនុវត្ដតាមយន្ដការរដ្ឋាភិបាលរបស់ខ្លួន
និងទៅតាមគណៈកម្មការព្រំដែន ដើម្បីឲ្យតំបន់ជម្លោះនោះមានសន្ដិភាព។
លោកបញ្ជាក់ថា កងទ័ពថៃ ធានាថាពួកគេ នឹងមិនឲ្យមានការប៉ះទង្គិចគ្នា
រវាងកងកម្លាំងរបស់ប្រទេសទាំងពីរ ៖ "គាត់ថា ខាងគាត់គឺធានា
ធានាទទួលខុសត្រូវអំពីការប៉ះទង្គិចគ្នាជាមួយនឹងភាគីកម្ពុជាយើងផង
ដែរ ធានាការកុំឲ្យមាន បញ្ចៀសកុំឲ្យមានការប៉ះទង្គិចគ្នា
អាហ្នឹងត្រូវប្រើពេលវេលា ទៅតាមរយៈយន្តការរបស់គណៈកម្មការ"។
មេបញ្ជាការកងពលអន្ដរាគមន៍លេខ៣របស់
កម្ពុជា លោក ស្រី ឌឹក មានប្រសាសន៍ថា ភាគីកម្ពុជា
នឹងបន្ដរក្សាសន្ដិភាពសណ្ដាប់ធ្នាប់
និងសហប្រតិបត្ដិការល្អជាមួយជាមួយភាគីថៃ
ដោយឲ្យកម្លាំងកងទ័ពឈរជើងនៅកន្លែងដើមដដែល។ លោកបន្ដថា
ដោយឡែកការប្រកាសសាលដីការបស់តុលាការយុត្ដិធម៌អន្ដរជាតិទីក្រុង
ឡាអេ(ICJ)នោះ ជាភារៈកិច្ចរដ្ឋាភិបាលទាំងពីរ ៖
"ពាក់ព័ន្ធតែកងទ័ពនៅព្រំដែនទេ គឺយើងរក្សាលំនឹង
ស្ថានភាពសហប្រតិបត្តិការល្អជាមួយគ្នា យើងទាំងអស់គ្នាគោរពហើយ
ប៉ុន្តែដោយឡែកយើងទេ ដែលត្រូវតែគោរពបទបញ្ជារៀងខ្លួនដែរ
យប់ម៉ិញសម្តេចនាយករដ្ឋមន្ត្រី គាត់បានផ្តាំផ្ញើថា
ឲ្យជួយខិតខំធ្វើម៉េចមានការអត់ធ្មត់ ហើយសហការគ្នាឲក្យបានល្អ
ឈរកន្លែងណាគឺឈរនៅកន្លែងហ្នឹង គឺកុំជ្រៀតជ្រែកអ្នកដទៃ
ហើយគាត់ផ្តាំផ្ញើថែមទៀត ឲ្យយើងខិតខំអប់រំប្រជាពលរដ្ឋ
ប្រជាពលរដ្ឋយើងឲ្យយល់ពីបញ្ហាហ្នឹង"។
កាសែតបាងកកប៉ុស្តិ៍
រាយការណ៍នៅថ្ងៃអង្គារនេះថា មន្ត្រីជំនាញថៃ
នឹងពិភាក្សាឲ្យបានលម្អិតទៅលើការសម្រេចរបស់សាលាដីកា
មុនពេលចរចាជាមួយកម្ពុជា។ នាយករដ្ឋមន្ត្រីថៃ លោកស្រី យីងឡាក់
មានប្រសាសន៍ថា ប្រទេសថៃ នឹងចូលការចរចាជាមួយកម្ពុជា
ដើម្បីបញ្ចប់ជម្លោះ ដោយបញ្ជាក់ថា ការចរចា
នឹងមិនរំលោភរដ្ឋធម្មនុញ្ញរបស់ថៃ ដោយឈរលើប្រយោជន៍ជាតិ
និងស្មារតីអាស៊ាន។ លោកស្រីបន្តថា លោកស្រី
ចង់ឲ្យប្រជាជនថៃទាំងអស់ មានជំនឿទៅលើរដ្ឋាភិបាល
ដែលនឹងប្រឹងឲ្យអស់ពីសមត្ថភាពក្នុងការការពារផលប្រយោជន៍ជាតិ។
ចំណែក លោកនាយករដ្ឋមន្ត្រី ហ៊ុន សែន
ក៏បានអំពាវនាវដល់កងកម្លាំងប្រដាប់អាវុធ
ដែលកំពុងបំពេញភារកិច្ចការពារព្រំដែន និងពលរដ្ឋកម្ពុជាទាំងអស់
បន្តរក្សាភាពស្ងប់ស្ងាត់ រក្សាការឈរជើងនៅដដែល
ជៀសវាងការប៉ះទង្គិចដោយអាវុធ
ហើយទុកលទ្ធភាពជូនយន្តការនៃរាជរដ្ឋាភិបាលទាំងពីរ បន្តការពិភាក្សា
ដើម្បីជំរុញការអនុវត្តសាលដីការបស់តុលាការយុត្តិធម៌អន្តរជាតិ។
យ៉ាងណាក៏ដោយ
រហូតមកដល់ថ្ងៃទី១២ខែវិច្ឆិកានេះ
ស្ថានភាពនៅតាមព្រំដែនក្បែរប្រាសាទព្រះវិហារ មានសភាពភាពស្ងប់ស្ងាត់
តែចំនួនភ្ញៀវទេសចរណ៍ជាតិ និងអន្ដរជាតិ
ដែលទៅទស្សនាប្រាសាទបុរាណនោះ មានការថយចុះ គឺមានមិនដល់១០០នាក់ទេ
បើប្រៀបធៀបនឹងថ្ងៃធម្មតា ភ្ញៀវទេសចរណ៍ មានជាង៣០០នាក់
ក្នុងមួយថ្ងៃ។ ចំណែកពលរដ្ឋមួយចំនួនក្នុងខេត្តព្រះវិហារ
នៅតែមានការភ័យខ្លាចនៅឡើយ បន្ទាប់ពីតុលាការICJ បកស្រាយសាលដីកា៕
ប្រភពពី៖ វីអូឌីហតញូ
No comments:
Post a Comment